53-modda. Choralarning va sanktsiyalarning qo'llanilishi

Markaziy bank ushbu Qonunning 54, 55 va 56-moddalarida ko'rsatilgan qoidabuzarliklar uchun javobgar bo'lgan bankka, uning kuzatuv kengashi va boshqaruvi, bankning islomiy moliya kengashi a'zolariga, shuningdek bankning muhim ahamiyatga ega xodimlariga nisbatan choralar va sanktsiyalar qo'llashga haqli. Qoidabuzarliklar qo'pol, jiddiy va juz'iy qoidabuzarliklarga bo'linadi. Choralar va sanktsiyalarni qo'llash tartibi Markaziy bank tomonidan belgilanadi. Choralar va sanktsiyalar qo'llanilganda Markaziy bank quyidagilarni hisobga oladi: tavakkalchilikning darajasini, qoidabuzarliklarning xususiyatini, miqyosini va oqibatlarini; qoidabuzarliklarning tizimliligini va davomiyligini; yo'l qo'yilgan qoidabuzarliklarning moliyaviy holatga ta'sirini; qo'llaniladigan choralar va (yoki) sanktsiyalar natijasida vaziyatni o'zgartirish imkoniyatini; aniqlangan qoidabuzarliklarning va (yoki) tavakkalchiliklarning yuzaga kelishiga olib kelgan sabablarni; ilgari qo'llanilgan choralar va sanktsiyalarning samaradorligini (natijadorligini); bank, bevosita va bilvosita aktsiyador tomonidan, shu jumladan oxirgi benefitsiar mulkdor, kuzatuv kengashining va boshqaruvning, bank islomiy moliya kengashining a'zosi, bankning muhim ahamiyatga ega xodimi tomonidan qoidabuzarliklarni bartaraf etishga qaratilgan mustaqil choralar ko'rilishini.