17-modda. Mablag'larni erkin o'tkazish kafolatlari

Investorlarga soliqlar va to'lovlarni to'lash sharti bilan chet el valyutasidagi mablag'larni O'zbekiston Respublikasiga va O'zbekiston Respublikasidan cheklovlarsiz erkin o'tkazish, shu jumladan valyutani repatriatsiya qilish uchun ayirboshlash kafolatlanadi. Bunday o'tkazmalar quyidagilarni o'z ichiga oladi: chet el investitsiyalarini saqlab turish yoxud ko'paytirish uchun boshlang'ich va qo'shimcha summalar; investitsiyalarni amalga oshirishdan olingan daromad; yetkazilgan zararlarning o'rnini ushbu Qonunga muvofiq qoplash sifatida olingan mablag'lar; shartnomalar shartlarini bajarish tartibida amalga oshirilgan to'lovlar; chet el investitsiyalarini to'liq yoki qisman sotishdan tushgan tushum; nizoni hal qilish oqibatida, shu jumladan har qanday sud yoki arbitraj qarori oqibatida yuzaga keladigan to'lovlar; xodimlarning ish haqi va boshqa to'lovlari; qonunchilikka muvofiq boshqa manbalardan olingan mablag'lar. O'zbekiston Respublikasining qonunlari hamda xalqaro shartnomalariga muvofiq davlat chet ellik investorning mablag'larini repatriatsiya qilishni chet el investitsiyalari ishtirokidagi korxona to'lovga qobiliyatsiz bo'lgan yoki kreditorlarning huquqlari buzilgan, jismoniy shaxs bo'lgan chet ellik investor tomonidan jinoiy qilmishlar yoki ma'muriy huquqbuzarliklar sodir etilgan hollarda yoxud sud yoki arbitraj qaroriga muvofiq shunday repatriatsiya qilishni to'xtatib turishning boshqa zarurati bo'lganda qonunchilik hujjatlarini investorlarni kamsitmaydigan tarzda qo'llash shartlari asosida to'xtatib turishi mumkin.