509⁹-modda. Kassatsiya instantsiyasi sudining vakolatlari

Kassatsiya instantsiyasi sudi jinoyat ishini ko'rish natijalariga ko'ra quyidagi qarorlardan birini qabul qiladi: 1) hukmni o'zgarishsiz, kassatsiya shikoyatini (protestini) esa qanoatlantirmasdan qoldirish to'g'risida; 2) ayblov hukmini bekor qilish va oqlov hukmini chiqarish haqida; 3) ayblov hukmini bekor qilish va yangi ayblov hukmini chiqarish to'g'risida; 4) oqlov hukmini bekor qilish va ayblov hukmini chiqarish haqida; 5) hukmni bekor qilish va ishni tugatish to'g'risida; 6) ushbu Kodeks 493-moddasining to'rtinchi qismida nazarda tutilgan holatlar mavjud bo'lgan taqdirda, sudning ayblov hukmini bekor qilish va jinoyat ishini birinchi instantsiya sudiga yuborish haqida; 7) hukmni o'zgartirish to'g'risida; 8) shikoyat (protest) qaytarib olingan hollarda, kassatsiya tartibida ish yuritishni tugatish haqida. Ushbu modda birinchi qismining 1-bandida, 5 — 8-bandlarida nazarda tutilgan hollarda kassatsiya instantsiyasi sudi ajrim chiqaradi. Ushbu modda birinchi qismining 2 — 4-bandlarida nazarda tutilgan hollarda kassatsiya instantsiyasi sudi kassatsiya hukmini chiqaradi.