1-modda. Ushbu Qonunning maqsadi va qo'llanilish sohasi

Ushbu Qonunning maqsadi litsenziyalash, ruxsat berish va xabardor qilish sohasidagi munosabatlarni tartibga solishdan iborat. Ushbu Qonunning amal qilishi: intellektual mulk ob'yektlaridan foydalanish, shuningdek kompleks tadbirkorlik litsenziyasi shartnomasi (franshizing to'g'risidagi shartnoma) asosida amalga oshiriladigan tadbirkorlik faoliyati; tadbirkorlik sub'yektlarini, bitimlarni, huquqlarni va mol-mulkni davlat ro'yxatidan o'tkazish hamda hisobga qo'yish; akkreditatsiya qilish, sertifikatlashtirish, standartlashtirish, metrologiya va texnik jihatdan tartibga solish; davlat ekologik ekspertizasi; atom energiyasidan foydalanish sohasidagi faoliyat; ushbu Qonunning 2-ilovasida ko'rsatilmagan ruxsat etish xususiyatiga ega hujjatlarni jismoniy shaxslarga berish bilan bog'liq munosabatlarga nisbatan tatbiq etilmaydi. Ushbu Qonunning 1, 2 va 3-ilovalariga muvofiq O'zbekiston Respublikasi Markaziy banki vakolatlariga taalluqli bo'lgan litsenziyalash, ruxsat berish va xabardor qilish tartib-taomillari tegishli faoliyat sohalaridagi munosabatlarni tartibga soluvchi qonunlarda belgilangan tartibda amalga oshiriladi. Ushbu Qonunning 1, 2 va 3-ilovalariga muvofiq O'zbekiston Respublikasi Istiqbolli loyihalar milliy agentligining vakolatlariga taalluqli bo'lgan litsenziyalash, ruxsat berish va xabardor qilish tartib-taomillari tegishli faoliyat sohalaridagi munosabatlarni tartibga soluvchi qonunchilik hujjatlarida belgilangan tartibda amalga oshiriladi. Ushbu Qonunning 1-ilovasiga muvofiq O'zbekiston Respublikasi Energetika bozorini rivojlantirish va tartibga solish agentligining vakolatlariga taalluqli bo'lgan litsenziyalash tartib-taomillari tegishli faoliyat sohalaridagi munosabatlarni tartibga soluvchi qonunchilik hujjatlarida belgilangan tartibda amalga oshiriladi.