155-modda. Hal qiluv qarori qabul qilinishining sir tutilishi

Sudning hal qiluv qarori alohida xonada (maslahatxonada) qabul qilinadi. Ish hay'atda ko'rib chiqilayotganda hal qiluv qarori sudyalar maslahati sirini saqlash ta'minlanadigan sharoitlarda, sud majlisida ishtirok etayotgan sudyalar tomonidan ko'pchilik ovoz bilan qabul qilinadi. Sud hal qiluv qarorini qabul qilayotgan maslahatxonada faqat ishni ko'rib chiqayotgan sud tarkibiga kiradigan sudyalar bo'lishi mumkin. Ushbu xonaga boshqa shaxslarning kirishi, shuningdek sud tarkibiga kirmaydigan shaxslar bilan muloqotda bo'lishning boshqa usullari taqiqlanadi. Sudyalar hal qiluv qarorini qabul qilish chog'idagi muhokama mazmuni to'g'risidagi, sud tarkibiga kirgan ayrim sudyalarning nuqtai nazari haqidagi ma'lumotlarni biror-bir shaxsga xabar qilishga, sudyalar maslahati sirini boshqa usulda oshkor qilishga haqli emas.