19-modda. Davlat mulkining ob'yektlari

1. O'zbekiston Respublikasining mutlaqo mulkiga: yer ( qonunchilikda nazarda tutilgan hollarda, tartibda va shartlarda mulk qilib berilgan yerlardan tashqari), yer osti boyliklari, ichki suvlar, respublika hududi doirasidagi havo havzasi, o'simlik va hayvonot dunyosi; O'zbekiston Respublikasi davlat hokimiyati va boshqaruv organlarining mol-mulki; jumhuriyat xalqlarining madaniyat va tarixiy boyliklari; jumhuriyat byudjetining mablag'lari, jumhuriyat va davlat ahamiyatidagi banklar, sug'urta, rezerv fondlari va boshqa davlat fondlari; davlat ahamiyatiga molik korxonalar, davlat oliy ta'lim tashkilotlari, ijtimoiy-madaniy soha ob'yektlari hamda davlatning respublika istiqlolini va iqtisodiy mustaqilligini ta'minlovchi boshqa mol-mulklari kiradi. 2. Davlat talab-ehtiyojlarini ta'minlash uchun Qoraqalpog'iston Respublikasi tomonidan yer maydonlari hamda boshqa tabiiy zaxiralar va ob'yektlarni berish tartibi Qoraqalpog'iston Respublikasi bilan O'zbekiston Respublikasi o'rtasidagi shartnomada belgilab qo'yiladi.