2-band. 1-bob. Umumiy qoidalar — 2-band

Ushbu Nizomda quyidagi asosiy tushunchalar qo'llaniladi: O'zbekiston Respublikasi Ichki ishlar vazirligining maxsus ma'lumotlar bazasi ― O'zbekiston Respublikasi Ichki ishlar vazirligining (keyingi o'rinlarda ― Ichki ishlar vazirligi) respublika hududida yo'l harakati xavfsizligi qoidalarini buzish holatlarini qayd etish hamda ularning hisobini yuritish bo'yicha avtomatlashtirilgan axborot tizimi; xorijiy avtotransport vositalari ― xorijiy davlatlarning ro'yxatga olish idoralarida ro'yxatda turgan va O'zbekiston Respublikasi hududiga chet el fuqarolari va O'zbekiston Respublikasi hududida doimiy yashash joyiga ega bo'lmagan fuqaroligi bo'lmagan shaxslarning shaxsiy ehtiyojlarini qondirish, shuningdek, yuklar va yo'lovchilarni xalqaro tashish maqsadida vaqtincha olib kiriladigan avtotransport vositalari; xorijiy avtotransport vositasining haydovchisi ― O'zbekiston Respublikasi hududida xorijiy avtotransport vositasini boshqaradigan shaxs; chiqish (kirish) bojxona posti ― o'z faoliyatini O'zbekiston Respublikasi Davlat bojxona qo'mitasi (keyingi o'rinlarda ― Davlat bojxona qo'mitasi) hududiy boshqarmasining bevosita rahbarligida amalga oshiradigan va uning tarkibiga kiradigan, O'zbekiston Respublikasi Davlat chegarasining o'tish punktida joylashgan davlat bojxona organi.