12¹-modda. Kredit byurolariga nisbatan qo'llaniladigan choralar va sanktsiyalar

O'zbekiston Respublikasi Markaziy banki quyidagi qoidabuzarliklar sodir etilganligi uchun kredit byurolariga nisbatan choralar va sanktsiyalar qo'llaydi: kredit axboroti almashinuvi to'g'risidagi va kredit byurolari faoliyatini tartibga soluvchi qonunchilik talablariga rioya etmaganlik; kredit byurolari xizmatlari iste'molchilarining huquqlarini buzganlik; litsenziya qalbaki hujjatlardan foydalangan holda olinganligi fakti aniqlanganligi. Ushbu moddaning birinchi qismida ko'rsatilgan qoidabuzarliklar aniqlanganda O'zbekiston Respublikasi Markaziy banki quyidagi choralar va sanktsiyalarni qo'llashga haqli: kredit byurolariga ularning faoliyatida aniqlangan qoidabuzarliklarni bartaraf etish to'g'risida, shu jumladan kredit byurolari xizmatlari iste'molchilarining huquqlari buzilishiga olib keluvchi sabablarni bartaraf etish haqida bajarilishi majburiy bo'lgan ko'rsatmalar yuborish; bazaviy hisoblash miqdorining besh ming baravarigacha bo'lgan miqdorda jarima undirish. Choralar va sanktsiyalarni qo'llashda O'zbekiston Respublikasi Markaziy banki quyidagilarni hisobga oladi: qoidabuzarliklarning xususiyatini, miqyosini va oqibatlarini; qoidabuzarliklarning tizimliligi va davomiyligini; qo'llaniladigan choralar va (yoki) sanktsiyalar natijasida vaziyatni o'zgartirish imkoniyatini; aniqlangan qoidabuzarliklarning yuzaga kelishiga olib kelgan sabablarni; ilgari qo'llanilgan choralar va sanktsiyalarning samaradorligini (natijadorligini).