3-modda. Mas'uliyati cheklangan jamiyatning huquqiy holati

Bir yoki bir necha shaxs tomonidan ta'sis etilgan, ustav fondi (ustav kapitali) ta'sis hujjatlari bilan belgilangan miqdorlarda ulushlarga bo'lingan xo'jalik jamiyati mas'uliyati cheklangan jamiyat (bundan buyon matnda jamiyat deb yuritiladi) deb hisoblanadi. Jamiyat qonunchilikda belgilangan tartibda davlat ro'yxatidan o'tkazilgan paytdan e'tiboran yuridik shaxs maqomiga ega bo'ladi. Jamiyat qonunchilikda belgilangan tartibda boshqa yuridik shaxslarning muassisi bo'lishga yoki ularning ustav fondida (ustav kapitalida) boshqacha tarzda ishtirok etishga, vakolatxonalar va filiallar tuzishga haqlidir. Jamiyat, agar uning ta'sis hujjatlarida boshqacha qoida belgilanmagan bo'lsa, nomuayyan muddatga tuziladi. Jamiyat o'zining to'liq firma nomi davlat tilida ifodalangan va jamiyatning joylashgan yeri ko'rsatilgan dumaloq shakldagi muhrga ega bo'lishga haqli. Jamiyatning muhrida uning firma nomi jamiyatning tanloviga ko'ra ta'sis hujjatlarida ko'rsatilgan boshqa tillarda ham ifodalanishi mumkin. Jamiyat o'zining firma nomi yozilgan shtamplariga va blankalariga, o'z emblemasiga, shuningdek belgilangan tartibda ro'yxatdan o'tkazilgan tovar va (yoki) xizmat ko'rsatish belgilariga hamda fuqarolik muomalasi ishtirokchilarini, tovarlar, ishlar va xizmatlarni individuallashtiruvchi boshqa vositalarga ega bo'lishga haqli. Jamiyat o'zining mustaqil balansida hisobga olinadigan alohida mol-mulkka ega bo'ladi, o'z nomidan huquqlarni olishi, majburiyatlarni o'z zimmasiga olishi, sudda da'vogar yoki javobgar bo'lishi mumkin. Jamiyat qonunchilikda taqiqlanmagan har qanday faoliyat turlarini amalga oshirishi mumkin. Jamiyat o'z ta'sis hujjatlarida ko'rsatilmagan faoliyat turi bilan ham shug'ullanishi mumkin. Ro'yxati qonunda belgilanadigan ayrim faoliyat turlari bilan jamiyat faqat litsenziya yoki ruxsat etish xususiyatiga ega hujjatlar asosida yoxud xabardor qilish tartibida shug'ullanishi mumkin.