149-modda. Qarzdorning mol-mulki bilan ta'minlangan kreditorlarning talablarini qanoatlantirish

Qarzdorning mol-mulki bilan ta'minlangan kreditorlarning talablarini qanoatlantirish ushbu mol-mulk sotilganidan keyin tushgan mablag'lar hisobidan amalga oshiriladi. Bu mablag'larning qoldig'i ushbu Qonunning 150-moddasiga muvofiq kreditorlarning talablarini qanoatlantirish uchun yo'naltiriladi. Agar qarzdorning majburiyatlari bajarilishining ta'minoti sifatida berilgan mol-mulkini sotishdan tushgan summa kreditorlarning mazkur mol-mulk bilan ta'minlangan talablarini to'la qanoatlantirish uchun yetarli bo'lmasa, talablarning qolgan qismi ushbu Qonunning 150-moddasida belgilangan navbatga muvofiq qanoatlantiriladi. Qarzdorning majburiyatlari bajarilishining ta'minoti sifatida berilgan mol-mulkini realizatsiya qilish bo'yicha elektron onlayn-auktsion shaklidagi kimoshdi savdosi va (yoki) takroriy elektron onlayn-auktsion shaklidagi kimoshdi savdosi amalga oshmagan deb topilgan taqdirda, mazkur mol-mulk talablari ushbu mol-mulk bilan ta'minlangan kreditorlarga o'z talablari hisobiga o'tkazish uchun belgilangan tartibda qabul qilish uchun taklif etiladi. Agar qarzdorning majburiyatlari bajarilishining ta'minoti sifatida berilgan mol-mulkining bozor qiymati kreditorlarning ushbu mol-mulk bilan ta'minlangan talablaridan ko'p bo'lsa, bunda yuzaga kelgan farqning o'rni mazkur mol-mulkni o'z talablari hisobiga qabul qilayotgan kreditorlar tomonidan pul shaklida qoplanadi. Agar qarzdorning butun mol-mulki majburiyatlar bajarilishining ta'minoti sifatida qabul qilingan bo'lsa va mazkur mol-mulkni sotishdan tushgan summa kreditorlarning qarzdorning barcha mol-mulki bilan ta'minlangan talablari summasidan kam yoki unga teng bo'lib qolsa, u holda ushbu kreditorlarning talablarini qanoatlantirish ushbu Qonun 150-moddasining birinchi qismida nazarda tutilgan xarajatlarning o'rni qoplanganidan va talablar qanoatlantirilganidan keyin hamda ish haqi to'lash uchun pul mablag'lari berilishini nazarda tutuvchi to'lov hujjatlari bo'yicha talablar qanoatlantirilganidan keyin amalga oshiriladi.